اسلام آباد (اے پی پی) صدر مملکت ممنون حسین کل (بدھ کو) پارلیمنٹ کے دونوں ایوانوں کے مشترکہ اجلاس سے خطاب کریں گے۔ اجلاس کی صدارت سپیکر قومی اسمبلی سردار ایاز صادق کریں گے۔ اجلاس بدھ کی صبح 11بجے پارلیمنٹ ہاؤس میں ہو گا۔ قومی اسمبلی سیکرٹریٹ نے پارلیمنٹ کے مشترکہ اجلاس کے لئے تمام انتظامات کو حتمی شکل دیدی ہے، اس موقع پر آئینی اداروں کے سربراہان، سروسز چیفس، سفارتکاروں سمیت اہم شخصیات کو دعوت نامے جاری کر دئیے گئے ہیں۔ مشترکہ اجلاس کے موقع پر پارلیمنٹ ہاؤس میں سخت ترین حفاظتی اقدامات کئے گئے ہیں۔ خصوصی دعوت ناموں کے بغیر کسی کو بھی پارلیمنٹ ہاؤس میں داخلے کی اجازت نہیں ہو گی، واضح رہے کہ صدر مملکت کے خطاب کے لئے پہلے 2جون کو پارلیمنٹ کا مشترکہ اجلاس طلب کیا گیا تاہم بعض وجوہات کی بناء پر صدر مملکت نے آئین کے آرٹیکل 54(1) اور 56(3) کے تحت حاصل اختیارات کو بروئے کار لاتے ہوئے 2جون کو اجلاس طلب کرنے کا فیصلہ واپس لے لیا جس کے بعد صدر مملکت نے دونوں ایوانوں کا مشترکہ اجلاس یکم جون (بدھ کو) طلب کیا ہے۔