اسلام آباد (آن لائن)عوامی مسلم لیگ کے سربراہ شیخ رشید احمد نے کہا ہے کہ اگر آرمی چیف نے امریکی سفیر کو طلب کر کے احتجاج کرنا ہے تو وزیر اعظم کا کیا فائدہ؟وزیر اعظم صرف فوٹو سیکشن کیلئے رہ گئے ہیں ۔جمعرات کے روز نجی ٹی وی سے گفتگو کرتے ہوئے شیخ رشید نے کہا کہ قوم ٹی او آرز کیلئے بنائی پارلیمانی کمیٹی کی طرف دیکھ رہی ہے ،کمیٹی کو جلد از جلد ٹی او آرز تشکیل دینے چاہئیں ،ہم نے اپوزیشن جماعتوں سے واضح کر دیا ہے کہ اگر پارلیمانی کمیٹی میں کوئی فیصلہ نہیں ہوتا تو چھوڑیں پھر حتمی فیصلہ سڑکوں پر کریں گے ،انہوں نے کہا کہ ٹی او آرز کی حتمی منظوری ’’ہم‘‘ نے دینی ہے ،اپوزیشن نے جو مطالبات پیش کئے تھے وہی مطالبات ٹی او آرز میں شامل کئے جائیں گے ۔شیخ رشید نے مزید کہا کہ وزیر اعظم صرف فوٹو سیکشن کیلئے رہ گئے ہیں ،ڈرون حملے ملکی مختاری اور سالمیت کی خلاف ورزی ہے اور آرمی چیف نے امریکی سفیر کو طلب کر کے شدید احتجاج ریکارڈ کرایا ہے ۔