اسلام آباد (این این آئی )پاکستان نے امریکی سفیر کو دفتر خارجہ طلب کر کے بلوچستان میں ڈرون حملے پر تشویش کا اظہار کرتے ہوئے واضح کیا ہے کہ امریکی ڈرون حملہ پاکستان کی خود مختاری اور اقوام متحدہ کے چارٹر کی خلاف ورزی ہے ، دہشتگردی کیخلاف پاک امریکہ تعاون قائم رہنا ضروری ہے ۔ پیر کو دفتر خارجہ سے جاری بیان کے مطابق پاکستان میں امریکی سفیر ڈیو ڈ ہیل کو وزیراعظم کے معاون خصوصی برائے خارجہ امور سید طارق فاطمی کی جانب سے دفتر خارجہ طلب کیا گیا اور 21 مئی کو پاکستانی حدود میں کئے گئے ڈرون حملے پر تشویش کا اظہار کیا ۔ ملاقات کے دوران سید طارق فاطمی نے نشاندہی کی کہ امریکہ کی طرف سے کیا گیا ڈرون حملہ پاکستان کی خود مختاری اور اقوام متحدہ کے چارٹر کی خلاف ورزی ہے جس میں رکن ممالک کی علاقائی سالمیت کے احترام کی ضمانت دی گئی ہے ۔ انہوں نے زور دیا کہ اس طرح کے اقدامات چار فریقی رابطہ گروپ کی جانب سے افغان حکومت اور طالبان کے درمیان امن مذاکرات کیلئے کی جانیوالی کوششوں پر منفی اثرات مرتب کرینگے ۔ وزیراعظم کے معاون خصوصی نے کہا کہ پاکستان اور امریکہ دہشتگردی کی لعنت کیخلاف جنگ میں قریبی رابطے میں رہے ہیں اور اس تعاون کو قائم رکھنے کی ضرورت ہے ۔