راولپنڈی(این این آئی)پاکستان نے پاک افغان برادرانہ تعلقات کے فروغ اور باڈر مینجمنٹ بہتر بنانے کیلئے انگور اڈا چیک پوسٹ افغان حکام کے حوالے کر دی ، سرحد سے متعلق تمام امور باہمی مشاورت کے ذریعے دوستانہ انداز میں حل کئے جائیں گے ۔ آئی ایس پی آر کے مطابق پاکستان اور افغانستان کے درمیان برادرانہ تعلقات کے فروغ اور بارڈر مینجمنٹ بہتر بنانے کیلئے پاک افغان سرحد پر انگور اڈا کے مقام پر تعمیر کی گئی چیک پوسٹ افغانستان کے حوالے کر دی گئی ہے ۔ بیان کے مطابق انگور اڈا چیک پوسٹ ہفتہ کو افغان حکام کے حوالے کی گئی ۔ اس اقدام سے پاک افغان سرحد پر امن اور استحکام کے قیام کیلئے اقدامات میں تیزی آئیگی ۔ آئی ایس پی آر کے مطابق اس عزم کا اعادہ کیا گیا ہے کہ سرحد سے متعلق تمام امور باہمی مشاورت کے ذریعے دوستانہ انداز میں حل کئے جائیں گے ۔