اسلام آباد (این این آئی)وزیر اعظم کے امور خارجہ کے مشیر طارق فاطمی نے کہا ہے کہ امید ہے اوباما انتظامیہ پاکستان کی فوجی مالی امداد کے حوالے سے سینیٹ کو قائل کر لیگی۔ برطانوی نشریاتی ادارے کو دیئے گئے انٹرویو میں طارق فاطمی نے کہا کہ پاکستان دہشتگردی کے خلاف کارروائیاں انعام یا کسی کی خوشنودی کیلئے نہیں کرتا بلکہ انسداد دہشتگردی کے خلاف کارروائیاں اس کے قومی مفاد میں ہیں۔انھوں نے کہا کہ صدر براک اوباما اور وزیر خارجہ جان کیری پاکستان کے دوست ہیں اور انھوں نے ہمیشہ پاکستان کے مفادات کا تحفظ کیا ہے ٗہمیں پورا یقین ہے کہ وہ سینیٹ کو قائل کر لیں گے۔طارق فاطمی نے کہا کہ سینیٹ نے پاکستان کی امداد روکی نہیں ہے بلکہ کچھ شرائط عائد کی ہیں۔ انھوں نے کہا کہ اوباما انتظامیہ کس طرح سینیٹ کو قائل کرتی ہے یہ پاکستان کا درد سر نہیں ہے۔ایف 16 طیاروں کی فروخت کے حوالے سے امور خارجہ کے مشیر نے کہا کہ اس معاہدے کے بارے میں بھی بات چیت جاری ہے اور امید کی جاسکتی ہے کہ یہ معاملہ بھی حل کر لیا جائیگا۔انھوں نے کہا کہ پاکستان نے امریکی انتظامیہ اور سینیٹ کے کچھ ارکان کو بتا دیا ہے کہ دہشتگردی کے خلاف پاکستان کارروائیاں صرف پاکستان کے مفاد میں نہیں بلکہ امریکہ اور دوسری دنیا کا مفاد بھی اسی میں ہے۔انھوں نے کہا کہ اوباما انتظامیہ پر یہ واضح کیا جا چکا ہے کہ پاکستان کی امداد روکنے سیامریکہ اور پاکستان کے تعلقات بھی متاثر ہو سکتے ہیں۔شمالی وزیرستان میں شدت پسندوں کی محفوظ پناہ گاہوں کے حوالے سے انھوں نے کہا کہ ایسے دعوے حقائق کے بالکل برعکس ہیں۔انھوں نے کہا کہ پاکستان کی ایک لاکھ اسی ہزار فوجی اور ایئرفورس انھیں علاقوں میں کارروائیوں میں مصروف ہے ۔ انھوں نے کہا کہ افغانستان میں امریکہ اور ایساف کے اعلی فوجی کمانڈروں کو پاکستان کے قبائلی علاقوں میں لا کر وہاں شدت پسندوں کے خلاف کارروائیوں سے متعلق بریفنگ دی گئی ہے ۔انھوں نے کہا کہ کانگریس کے کچھ ارکان کے کچھ اورمقاصد بھی ہوسکتے ہیں تاہم اس پر مزید بات کرنا مناسب نہیں ہوگا۔