اسلام آباد(نیوزڈیسک) وزیردفاع خواجہ آصف نے عمران خان پر الزام عائد کیا ہے کہ انہوں نے شوکت خانم کی خیرات کے ستر کروڑ روپے آف شور کمپنیوں میں مسقط اورفرانس میں لگائے ہوئے ہیں انہوں نے کہا کہ کمیشن میں جب یہ مسئلہ جائے گا تو ہم ثبوت بھی دیںگے بغیر ثبوت کے بات نہیں کریںگے۔اس موقع پر خواجہ سعد رفیق نے دھمکی دی کہ اپوزیشن ریڈ لائن کراس نہ کرے ورنہ بہت بھاری پڑے گا انہوں نے اس سلسلے میں خاص طورپر پیپلزپارٹی کو انتباہ کیا انہوں نے کہاکہ عمران خان اور ان کے ساتھی بشمول پیپلزپارٹی کے بعض لوگ سیاسی فنکار ہیں اوروہ سیاستدانوں کا امیج خراب کررہے ہیں لوگ سوچنے پر مجبورہوجائیںکہ تمام سیاستدان گندے ہیں اور وہ ووٹ دینے سے بھی گریز کرنا شروع کردیں۔خواجہ آصف نے کہا کہ وزیراعظم نے گزشتہ تئیس سال کی ٹیکس ہسٹری بیان کردی ہے کوئی بھی لایبریری میں جاکر دیکھ سکتاہے۔انہوں نے کہا کہ تنازعہ جاری رکھنا ہے تو یہ تنازعہ دس سال بھی جاری رہے گا اگر اپوزیشن چاہتی ہے کہ مسئلہ حل ہو تو اس سلسلے میں قانون سازی کے لئے تعاون کرے ۔وزیراعظم نے اس سلسلے میں کھلی آفر کردی ہے خواجہ سعد رفیق نے کہاکہ وزیراعظم نے پیشکش کی ہے کہ قوانین میں جہاں جہاں کمی ہے ان پر بھی حکومت ترامیم کرنے کو تیار ہے۔اور یہ ایک بڑی پیشکش ہے اگر اپوزیشن کی کوئی جماعت سنجیدہ ہے کہ وہ ملک میں اکاﺅنٹبلٹی کے نظام کو مضبوط کرے تو وہ وزیراعظم کی پیشکش کامثبت جواب دے۔‎