کابل(این این آئی) وزیر اعظم نواز شریف نے سابق افغان صدر حامد کرزئی کو پاکستان کا دورہ کر نے کی دعوت دی ہے ۔ کابل میں پاکستان کے سفیر ابرابر حسین نے بدھ کو حامد کرزئی کے ساتھ ان کے دفتر میں ملاقات کے دور ان وزیراعظم کا خط پہنچایا ۔حامد کرزئی کے دفتر کی جانب سے جاری کئے گئے بیان میں کہاگیا کہ سابق صدر نے پاکستان آنے کی دعوت پر وزیر اعظم نواز شریف کا شکریہ ادا کیا اور کہاکہ وہ مناسب وقت پر پاکستان کا دورہ کرینگے ۔انہوں نے دہشتگردی کے خلاف دونوں ممالک کے تعاون پر زور دیتے ہوئے کہاکہ اس تعاون سے خطے میں امن قائم ہو سکتا ہے انہوں نے کہاکہ دہشتگردی اور انتہا پسندی دونوں ممالک کی مشترکہ دشمن ہے ۔حامد کرزئی نے پاکستان کی جانب سے افغان مہاجرین کو پناہ دینے پر پاکستان کے کر دار کو سراہا ۔