کوٹلی (نیوز ڈیسک ) پیپلز پارٹی کے چیئرمین بلاول بھٹو نے پاناما لیکس کی تحقیقات تک وزیر اعظم سے استعفے کا مطالبہ کر دیا ، کہتے ہیں میاں صاحب آپ کے دن گنے جا چکے ہیں ، حکومت ہچکولے کھا رہی ہے ، لگتا ہے تخت رائے ونڈ لرز رہا ہے ۔ بلاول بھٹو نے آزاد کشمیر میں شیر پر تیر برسا دیئے ، کوٹلی میں جیالوں سے خطاب کیا تو وزیر اعظم کو یوسف رضا گیلانی سے مانگا گیا استعفیٰ بھی یاد دلا دیا ، استعفیٰ ضرور مانگا لیکن بلاول کو لگتا ہے کہ حکومت کے دن گنے جا چکے ہیں ۔ بلاول نے نواز شریف پر سیاست دان کے بجائے صرف بزنس مین ہونے کا الزام لگایا ، جوش بڑھا تو بلاول کو تعلیم کا شعبہ یاد آگیا ۔ بلاول نے اورنج ٹرین کو دنیا کا مہنگا ترین منصوبہ قرار دیا اور کہا کہ یہ رقم غریب کشمیریوں پر خرچ کی جانی چاہئے تھی ۔ پیپلز پارٹی اب خاموش نہیں رہے گی ۔ بلاول بھٹو نے حکومت پر سابقہ حکومتوں سے زیادہ قرض لینے کا الزام لگایا اور یہ بھی بتایا دیا کہ اب ایسا نہیں چلے گا ، انہوں نے خواجہ یاسر شہید کے قاتلوں کو انجام تک پہنچانے کا بھی عزم کیا ۔