اسلام آباد(نیوزڈیسک) تحریک انصاف نے اسحاق ڈار اور عمران خان کے اثاثوں کی تحقیقات کا چیلنج قبول کرلیا ہے۔ نجی ٹی وی کے مطابق پی ٹی آئی کے وائس چیئرمین شاہ محمود قریشی نے کہاکہ تحریک انصاف وفاقی وزیرخزانہ اسحاق ڈار کی جانب سے دیئے گئے چیلنج کو قبول کرتی جس میں انہوں نے عمران خان اور اپنے 20 سال کے اثاثے ظاہر کر کے اس کا فورنزک آڈٹ کرانے کا چیلنج کیا تھا۔ شاہ محمود قریشی نے کہا کہ اسحاق ڈار کے چیلنج کو کھلے دل سے قبول کرتے ہیں اور جب وہ چاہیں اثاثوں کا آڈٹ کرالیں۔تحریک انصاف کے وائس چیئرمین نے کہاکہ پانامہ لیکس کی تحقیقات کے حوالے سے ٹی او آر پر حکومت، اپوزیشن سے مشاورت کیوں نہیں کرتی، حکومت اپنے ٹی او آر مسلط کرنا چاہتی ہے، ہماری تحریک اس سوچ کے خلاف ہے جس نے ملک کو بھکاری بنا دیا ہے ، تمام اپوزیشن جماعتوں سے مشاورت کر کے انکوائری کمیشن کے ٹی او آرز بنا کر حکومت کو دیں گے۔