اسلام آباد(نیوز ڈیسک )مہنگائی کے مارے عوام پر ایک اور بم گرانے کی تیاری کرلی گئی، حکومت نے پیٹرولیم مصنوعات کی قیمتوں میں اضافے کا عندیہ دے دیا۔چار دن کی چاندنی پھر اندھیری رات، سستے پیٹرول کی عیاشی ختم ہونے والی ہے، عوام تیار ہوجائیں، بین الاقوامی منڈی میں تیل کی بڑھتی ہوئی قیمتوں کا اثر پاکستان پر پڑنا شروع ہوگیا، یکم مئی سے پیٹرول اور ہائی اسپیڈ ڈیزل مہنگا ہونے کا امکان ہے۔ذرائع کا کہنا ہے کہ پیٹرول کی قیمت میں 2 روپے 67 پیسے فی لیٹر اضافہ متوقع ہے جبکہ ہائی اسپیڈ ڈیزل کی قیمت میں 3 روپے فی لیٹر اضافہ ہوسکتا ہے، ہائی آکٹین، مٹی کا تیل اور لائٹ ڈیزل کی قیمت برقرار رہنے کا امکان ہے۔اوگرا کی جانب سے نئی قیمتوں کی حتمی سمری رواں ماہ کے آخر میں حکومت کو ارسال کی جائے گی، حکومتی منظوری کے بعد نئی قیمتوں کا اطلاق ہوگا۔