میرپورخاص(نیوز ڈیسک) پاک سرزمین پارٹی کے رہنما مصطفیٰ کمال کا کہنا ہے کہ الطاف حسین کا چیپٹر کلوز ہوگیا اور انہیں ایک مسخرے سے زیادہ اہمیت نہ دی جائے جب کہ رابطہ کمیٹی کی اہمیت بھی کٹھ پتلی سے زیادہ نہیں۔میرپورخاص میں پاک سرزمین پارٹی کے رہنماؤں کے ہمراہ پریس کانفرنس کرتے ہوئے مصطفیٰ کمال کا کہنا تھا کہ جن لوگوں نے پتھر مارے انہیں اپنا بنانا ہے، ہم پتھر کا جواب پتھر سے نہیں دیں گے۔ انہوں نے کہا کہ ہم یہاں لیڈری کرنے یا وزیراعظم بننے نہیں بلکہ جہاد کرنے آئے ہیں اور ہم نے وقت کے فرعون کو للکارا ہے، یہ شخص ہمیں بھی کیڑے مکوڑے سمجھتا ہے جب کہ ہماری اس سے کوئی ذاتی لڑائی نہیں ہے، 24 اپریل کو 30 سال کی گندگی کو دفن کردیں گے۔مصطفیٰ کمال نے کہا ہے کہ الطاف حسین نے ہماری 2 نسلیں تباہ کیں اور ہزاروں لوگ مروا دیئے، سب جانتے ہیں نوجوان لڑکوں کو ’را‘ کا ایجنٹ کس نے بنایا جب کہ میں اردو بولنے والوں سے پوچھتا ہوں تم کس کے پیچھے چل رہے ہو۔ انہوں نے کہا کہ اگر ہم اس فرعون کو للکارے بغیرمرجاتے تو اللہ کوجواب نہیں دے سکتے تھے۔سابق سٹی ناظم کا کہنا تھا کہ ہماری پارٹی کا آج آٹھواں دن ہے اور یہ لوگ ہم سے خوفزدہ ہوگئے ہیں جو ہماری سب سے بڑی کامیابی ہے۔ مصطفیٰ کمال نے کہا کہ الطاف حسین کا چیپٹر کلوز ہوگیا،انہیں ایک مسخرے سے زیادہ اہمیت نہ دی جائے جب کہ رابطہ کمیٹی کی اہمیت بھی کٹھ پتلی سے زیادہ نہیں۔