لاہور(نیوز ڈیسک) آئی جی پنجاب پولیس مشتاق سکھیرا نے کہا ہے کہ پولیس کے پاس وسائل کی کمی کے باعث دہشت گرد اپنے مقصد میں کامیاب ہوجاتے ہیں اس لئے عوام بھی اپنے ارد گرد کے ماحول پر نظر رکھیں۔ لاہورمیں تقریب سے خطاب کے دوران آئی جی پنجاب کا کہنا تھا کہ پنجاب پولیس نے ہر محاذ پر دہشت گردوں کے خلاف جنگ لڑی، دہشتگردی کےخلاف اس جنگ میں پاک فوج اور پولیس سمیت دیگر فورسز نے جانوں کا نذرانہ پیش کیا، دہشت گردوں کے مکمل خاتمے تک چین سے نہیں بیٹھیں گے، یہ جنگ دہشت گردی کےخاتمے تک جاری رہے گی۔ مشتاق سکھیرا کا کہنا تھا کہ پولیس دن رات کام کررہی ہے، وسائل کی کمی کے باعث دہشت گرد اپنے مقصد میں کامیاب ہوجاتے ہیں، عوام سے گزارش ہے کہ وہ اپنے اردگرد ماحول پربھی نظررکھیں کیوں کہ دہشت گرد کہیں نہ کہیں کسی نہ کسی جگہ ٹھہرتے ہوں گے، ہمیں مل کر ان کے ٹھکانوں کو ختم کرنا ہوگا، اگر مل کر لڑائی لڑیں گے تو دہشت گردوں کو کہیں جگہ نہیں ملے گی۔