اسلام آباد (نیوز ڈیسک) پاکستان تحریک انصاف کے چیئر مین اور سابق کرکٹ ٹیم کے کپتان عمران خان نے کہا ہے کہ وہ بھارت پہنچ کر قومی ٹیم کا حوصلہ بڑھائیں گے۔ایک انٹرویومیں عمران خان نے کہاکہ پاکستان کی موجود کرکٹ ٹیم بہت اچھی ہے تاہم اس میں اعتماد کی کمی ہے۔انہوںنے کہاکہ ٹیم میں اعتماد کا فقدان ہے جس کی وجہ سے کارکردگی ناقص رہی ہے لیکن یہ کمی ٹیم کا حوصلہ بڑھا کر پوری کی جاسکتی ہے اور اسی ٹیم سے فتح حاصل کی جاسکتی ہے۔1992ءکے کرکٹ ورلڈ کپ کے فاتح کپتان نے کہاکہ یہ وقت اپنی ٹیم کو سپورٹ کرنے کا ہے۔جب عمران خان سے پوچھا گیا کہ کیا پاکستان کرکٹ بورڈ کے چیئرمین شہریار خان اور نجم سیٹھی انہیں ٹیم سے ملنے دیں گے تو عمران خان نے کہاکہ انہیں اس بات کی پرواہ نہیں کیونکہ وہ پاکستانی ٹیم کامورال بلند کرنا چاہتے ہیں۔بیٹنگ سٹریٹیجی ٹھیک نہیں لگ رہی جس کی وجہ سے شکست ہورہی ہے تاہم اسے ٹھیک کرکے میچ جیتے جاسکتے ہیں۔انہوں نے کہا کہ شاہد آفریدی نے ٹیلی فون پر رابطہ کیا تھا اور ملنے کی دعوت دی ہے اور وہ ان سے ضرور ملیں گے۔