اسلام آباد (نیوز ڈیسک) وزیراعظم محمد نواز شریف اور چیف آف آرمی سٹاف جنرل راحیل شریف سعودی فرمانروا شاہ سلمان بن عبدالعزیز السعود کی دعوت پر (کل) 9 مارچ سے سعودی عرب کا تین روزہ دورہ کرینگے۔ سعودی عرب کی جانب سے اتحادی افواج کی مشترکہ فوجی مشقوں ’نارتھ تھنڈر‘ کی اختتامی تقریب میں شرکت کیلئے متعدد سربراہان حکومت کو بھی دعوت دی گئی ہے۔ پاکستان سمیت 21 ممالک کے فوجی سعودی عرب کے شمالی علاقوں میں جاری مشقوں میں حصہ لے رہے ہیں۔ مشقوں کا اہم مقصد دہشت گرد گروپوں کی طرف سے درپیش خطرے سے نمٹنے کیلئے تربیت کے معیار کو بہتر بنانا ہے۔ دفتر خارجہ کے مطابق وزیراعظم محمد نواز شریف سعودی فرمانروا شاہ سلمان بن عبدالعزیز کی دعوت پر 9 سے 11 مارچ تک سعودی عرب کا دورہ کرینگے۔اس دورے میں آرمی چیف جنرل راحیل شریف اور وزیراعظم کے معاون خصوصی برائے خارجہ امور سید طارق فاطمی بھی ان کے ہمراہ ہونگے۔ڈی جی آئی ایس پی آر کے لیفٹیننٹ جنرل عاصم سلیم باجوہ کے مطابق چیف آف آرمی سٹاف جنرل راحیل شریف سعودی عرب کی خصوصی دعوت پر جنگی مشقیں دیکھنے سعودی عرب جائینگے۔ دفتر خارجہ کے بیان میں کہا گیا ہے کہ پاکستان کے سعودی عرب کے ساتھ قریبی برادرانہ تعلقات ہیں جو باہمی احترام اور یکجہتی کے رشتوں میں جڑے ہوئے ہیں ، ان تعلقات کو مشترکہ تاریخی ، ثقافتی اور اسلامی اقدار سے تقویت پہنچتی ہے۔ دونوں ممالک کے درمیان دفاع اور انسداد دہشت گردی کے شعبوں سمیت کثیرجہتی تعاون موجود ہے۔ دفتر خارجہ کے بیان میں کہا گیا ہے کہ پاکستانی عوام سعودی عرب کو انتہائی قدر کی نگاہ سے دیکھتے ہیں، حکومت پاکستان نے سعودی عرب کی علاقائی سالمیت اور خود مختاری کو درپیش کسی بھی خطرے کی صورت میں سعودی بھائیوں کےساتھ کندھے سے کندھا ملا کر کھڑے ہونے کے عزم کا اعادہ کیا ہے۔ دفتر خارجہ نے کہا کہ پاکستان نے عسکریت پسندی، انتہاءپسندی اور دہشت گردی کیخلاف تمام علاقائی اور بین الاقوامی اقدامات کی ہمیشہ حمایت کی ہے اور اس حوالے سے پاکستان بین الاقوامی برادری کےساتھ بھرپور حمایت کا اعادہ کرتا ہے۔