ایم کیو ایم کے رہنما اور سابق میئر کراچی مصطفی کمال نے الطاف حسین کی قیادت سے بغاوت کرتے ہوئے نئی سیاسی جماعت قائم کرنے کا اعلان کردیا ہے ۔ کراچی میں انیس قائم خانی کے ہمراہ پریس کانفرنس سے خطاب کرتے ہوئے انہوں نے واضح کیا کہ وہ یہاں کسی کو ٹیک اوور نہیں کرنے آئے۔ ان کا کہنا تھا کہ ہماری پارٹی کا آج کوئی نام نہیں کیونکہ ہم یہاں کسی کو ٹیک اوور نہیں کرنے آئے ۔پاکستان کا پرچم ہی میری پارٹی کا پرچم ہے ۔انہوں نے کہا کہ اس وقت ان کی پارٹی کا کوئی نام نہیں ۔ہماری نظریاتی پارٹی ہے،انہوں نے پاکستان کا پرچم دکھاتے ہوئے کہاکہ یہ پاکستان کا پرچم ہی میری پارٹی کا پرچم ہے۔انہوں نے کہا کہ میں پاکستان کے پرچم سے رنگ نکال کر اس کے رنگ مدھم نہیں کرنا چاہتا۔ہم نے اس لیے اس پرچم کو اپنی پارٹی کا پرچم بنایا کہ اس کو ماننے والا ہر مسلمان،عیسائی،ہندو،سکھ ،مہاجر،بلوچ،پنجابی،سندھی ہے جو بھی ہو اگر اس کو ماننے والا ہے ہم سمجھتے ہیں کہ اس کی عزت کرنا ہمارا فرض ہے۔انہوں نے کہا کہ ہم دنیا میں جاتے ہیں تو وہاں پی ٹی آئی،پی ایم ایل این پی پی پی سب کے الگ جلسے ہوتے ہیں،لیکن انڈین کو نہیں ایسا کرتے دیکھیں گے۔ہم انڈیا ،ایران،افغانستان سے مذاکرات کی بات کرتے ہیں۔لیکن اپنے ملک میں ہم ٹکروں میں بٹے ہوئے ہیں۔