جے پور (نیوز ڈیسک)بھارتی ریاست راجھستان کی جے پور جیل حکام نے پاکستانی ہائی کمیشن کی ٹیم کو پاکستانی قیدیوں سے ملنے سے روک دیا جبکہ ہائی کمیشن حکام نے کہا ہے کہ ملاقات کیلئے پیشگی اجازت لی گئی تھی۔بھارتی میڈیا کے مطابق نئی دہلی میں پاکستانی ہائی کمیشن کا چار رکنی وفد ریاست راجھستان کی جیل میں قید 25 پاکستانی قیدیوں سے ملنے گیا تھا تاہم جیل حکام نے نہ صرف پاکستانی ہائی کمیشن کے وفد کو قیدوں سے ملنے سے روکا بلکہ پاکستانی قیدیوں کی تعداد بھی پچیس کے بجائے گیارہ بتائی۔پاکستانی ہائی کمیشن حکام کے مطابق جیل میں پاکستانی قیدیوں سے ملنے کیلئے بھارتی وزارت خارجہ سے پیشگی اجازت لی گئی تھی۔رپورٹ کے مطابق پاکستانی ہائی کمیشن نے بھارتی وزیر خارجہ کے ساتھ معاملہ اٹھایا ¾ہائی کمیشن نے کہا کہ مستقبل میں ایسے واقعے کا اعادہ نہ ہونے کو یقینی بنایا جائے۔