اوکاڑہ(نیوز ڈیسک) پاک بھارت میچ کے دن ایڈیشنل ڈسٹرکٹ اینڈ سیشن عدالت نے ہندوستانی کرکٹر ویرات کوہلی کے فین عمر دراز کی درخواست ضمانت منظور کرلی۔22 سالہ عمر دراز ولد لیاقت علی نے گذشتہ ماہ جنوری میں ایڈیلیڈ میں ہندوستانی کرکٹ ٹیم کی فتح کے بعد اوکاڑہ کے قریب واقع ایک گاؤں (چک 54/2L) میں اپنے گھر کی چھت پر ہندوستانی پرچم لہرایا تھا جس کے بعد انہیں گرفتار کرلیا گیا تھا۔عمردراز کی درخواست ضمانت رواں ماہ 18 فروری کو مقامی جج انیق انور نے مسترد کردی تھی۔بعد ازاں ایڈووکیٹ رضوان اور محمد یوسف نے نے ایڈیشنل ڈسٹرکٹ ایند سیشن جج اسداللہ سراج کی عدالت میں عمر دراز کی ضمانت کی درخواست جمع کرائی۔ گزشتہ روز پولیس اور عدالتی دستاویزات کے مشاہدے اور دونوں جانب کے دلائل سننے کے بعد عدالت نے عمر دراز کی درخواست ضمانت منظور کرتے ہوئے اسے 50 ہزار روپے کے ضمانتی مچلکے جمع کرانے کا حکم دیا۔عمر دراز نے اپنی گرفتاری کے وقت کہا تھا کہ وہ ہندوستانی کرکٹ ٹیم کے بلے باز ویرات کوہلی کا مداح ہے اور اس نے اپنے مکان کی دیواروں پر اس کی تصاویر بھی لگا رکھی ہیں، تاہم اب اسے احساس ہوگیا ہے کہ اس نے ہندوستان کا پرچم لہرا کر غلطی کی۔