لاہور(نمائندہ خصوصی) وفاقی وزیر پیٹرولیم و قدرتی وسائل شاہد خاقان عباسی نے کہا ہے کہ ایران پر سے پابندیاں ہٹنے کے بعد دونوں ممالک کی باہمی تجارت میں اضافہ ہوگا بلکہ پاک ایران گیس پائپ لائن بھی مکمل ہو گی’ مارچ میں پیٹرولیم مصنوعات کی قیمتوں میں معمولی کمی ہو گی’ ہمارے دور میں گیس کے 70کنویں دریافت ہو چکے ہیں اور مزید کام جاری ہے۔ ہفتے کومیڈیا سے گفتگو میں شاہد خاقان عباسی نے کہا کہ الزامات لگانا اور تنقید کرنا سب سے آسان کام ہے ،لوگوں کوتوکئی اور کام نہیں ہوتا۔ پاکستان کی ترقی کے لئے دن رات کام کر رہے ہیں اور اس کے مثبت نتائج برآمد ہوئے ہیں۔ انہوں نے کہا کہ ایران پر سے پابندیاں ہٹنے کے بعد دونوں ممالک کی باہمی تجارت میں اضافہ ہوگا۔ گیس پائپ لائن بھی مکمل ہو گی۔ ایرانی تیل کی اسمگلنگ روکنے کیلئے کام کر رہے ہیں۔ انہوں نے مزید کہا کہ ہمارے دور میں گیس کے 70کنویں دریافت ہو چکے ہیں اور مزید کام جاری ہے۔انہوں نے کہا کہ آئی پی پیز اور اپٹما کوگرمیوں میں زیادہ گیس دینے کی یقین دہانی کرائی ہے۔ انہوں نے پیٹرولیم مصنوعات کی قیمتوں میں کمی کے حوالے سے سوال کے جواب میں کہا کہ پوری دنیا میں خرید کر استعمال کرنے والے ممالک میں پاکستان واحد ملک ہے جہاں پیٹرولیم مصنوعات کی قیمتیں سب سے کم ہیں۔ قیمتوں میں اب تک 41روپے کمی کر چکے ہیں اور حکومت نے اس مد میں کوئی اضافی رقم حاصل نہیں کی۔ انہوں نے کہا کہ آئندہ ماہ مارچ میں پیٹرولیم مصنوعات کی قیمتوں میں معمولی کمی ہو گی۔