لاہور (نیوز ڈیسک) وزیراعظم محمد نواز شریف کے نیب سے متعلق بیان کو لاہور ہائیکورٹ میں چیلنج کردیا گیا ۔ تحریک انصاف لائرزونگ کے صدر گوہر نواز سندھو کی جانب سے لاہورہائیکورٹ میں دائر کی گئی درخواست میں موقف اختیار کیا گیا ہے کہ نیب ایک آزاد اورخودمختارآئینی ادارہ ہے، یہ وزیراعظم کے ماتحت نہیں، وزیراعظم نوازشریف نے بیان دے کرنیب میں زیرسماعت مقدمات میں مداخلت کی ہے، اس لئے عدالت عالیہ وزیر اعظم نواز شریف کے خلاف قانون کے مطابق کارروائی کا حکم دے ۔واضح رہے کہ وزیر اعظم نواز شریف نے تین روز قبل بہاولپور میں پارٹی کارکنوں سے خطاب کے دوران کہا تھا کہ نیب سرکاری افسران کو ہراساں کررہی ہے، جس کی وجہ سے وہ اپنے امور کی انجام دہی میں خوف محسوس کر رہے ہیں۔ نیب کے چیئرمین کو ہر صورت نوٹس لینا چاہیے بصورت دیگر حکومت اس حوالے سے قانونی اقدامات کرسکتی ہے۔