جہلم(نیوز ڈیسک) صوبہ پنجاب کے شہر جہلم کے نواح میں ڈومیلی موڑ کے قریب ریلوے ٹریک پر ایک مشتبہ دہشت گرد نے خود کو دھماکے سے اڑالیا.پولیس ذرائع کے مطابق ایک شہری نے موٹر وے پولیس کو اطلاع دی کہ ایک ‘مشتبہ شخص’ جی ٹی روڈ کے قریب ریلوے ٹریک پر بارودی مواد نصب کررہا ہے.جب پولیس موقع پر پہنچی تو مذکورہ شخص سے فائرنگ کا تبادلہ ہوا، جس کے بعد اْس نے خود کو دستی بم کے ذریعے اڑالیا.پولیس کے مطابق مشتبہ دہشت گرد کے پاس سے ایک دستی بم اور 2 پستول بھی برآمد ہوئے.ڈسٹرکٹ انفارمیشن آفیسر اویس کی جانب سے بھی واقعے کی تصدیق کردی گئی.واقعے کے بعد ڈسٹرکٹ پولیس آفیسر (ڈی پی او) اور پولیس کی بھاری نفری جائے وقوع پر پہنچ گئی اور علاقے کو گھیرے میں لے کر سرچ آپریشن کا آغاز کردیا گیا.