اسلام آباد(نیوزڈیسک) وزیراعظم نوازشریف نے بھارت کے پٹھان کوٹ ایئربیس پر حملے کی تحقیقات کے لیے اعلیٰ سطح کی کمیٹی تشکیل دے دی ہے۔ جس میں پولیس، ایف آئی اے، ایم آئی، ایس ایس آئی اور سی ٹی ڈی کے افسران شامل ہیں جن میں ایڈیشنل آئی جی پنجاب رائے طاہر کمیٹی کے کنوینر ہوں گے جب کہ کمیٹی میں آئی ایس آئی کے بریگیڈیئر نعمان سعید، ملٹری انٹیلی جنس کے لیفٹیننٹ کرنل عرفان مرزا، ڈائریکٹر انٹیلی جنس بیورو عظیم ارشد، ڈائریکٹر ایف آئی اے عثمان انور اور ایڈیشنل آئی جی صلاح الدین شامل ہیں۔وزیراعظم نوازشریف کی جانب سے بنائی گئی کمیٹی پٹھان کوٹ حملے میں بعض افراد کے ملوث ہونےکی تحقیقات کرے گی جب کہ کمیٹی کسی بھی ادارے اور صوبائی حکومت سے معلومات اور معاونت بھی حاصل کرسکے گی۔وزیراعظم ہاؤس کی جانب سے اپیکس کمیٹی کے جاری اعلامیے کے مطابق پٹھان کوٹ واقعے میں اہم پیشرفت سامنے آئی ہے اور بھارت کی جانب سے فراہم کردہ معلومات اور ابتدائی تفتیش کی روشنی میں حملے میں ملوث ملزمان کو گرفتارکیا جاچکا ہے جن کا تعلق کالعدم جیش محمد سے ہے جب کہ ابتدائی معلومات کے مطابق کالعدم جیش محمد کے متعدد ارکان کو گرفتار کرتے ہوئے ان کے دفاترسیل کردیئے۔اعلامیے میں کہا گیا کہ دہشت گردی کے مکمل خاتمے کے عزم کے تحت بھارت سے رابطے میں ہیں اور حکومت ایک خصوصی تحقیقاتی ٹیم کو پٹھان کوٹ بھیجے گی تاہم اس حوالے سے بھارتی حکام سے مشاورت کے بعد ٹیم کو بھیجا جائے گا جب کہ پاکستان نے بھارت سے مزید معلومات بھی مانگ لی ہیں