نیویارک(ویب ڈیسک)دنیا بھرمیں کرسمس کی دعائیہ تقریبات کا آغاز ہوگیا۔ ویٹی کن اور بیت اللحم میں شب کرسمس کی خصوصی تقریبات کا انعقاد کیا گیا۔ فرانس اور بیلجیم میں کرسمس پر سیکیورٹی کے غیر معمولی انتظامات کیے گئے ہیں۔ویٹی کن سٹی میں شب کرسمس کی مرکزی تقریب ہوئی۔ سینٹ پیٹر بی سلیکا میں ہونے والی دعائیہ تقریب میں 10,000سے زائد مسیحوں نے شرکت کی۔ پوپ فرانسس نے اپنے خطاب میں دنیا بھر کے عیسائیوں کو کرسمس کی مبارکباد دی اور حضرت عیسی کی تعلیمات پر روشنی ڈالی۔فلسطین کے شہربیت اللحم اور مقبوضہ بیت المقدس کے شہر ناصرہ میں ہزاروں افراد نے کرسمس کا جشن منایا۔ چرچ میں دعائیہ تقریبات بھی ہوئیں۔ شام کے شہر دمشق کے چرچ میں بھی کرسمس کی دعائیہ تقریب ہوئی اور ملک میں خانہ جنگی کے خاتمے کے لیے خصوصی دعائیں مانگی گئیں۔ چین اور بھارت سمیت دنیا کے کئی ممالک میں مسیحی برداری نے رات گئے گرجا گھروں کا رخ کیا اور دعائیہ تقریبات میں شرکت کی۔ فرانس میں اس سال کرسمس پر سیکیورٹی کے غیر معمولی انتظامات کیے گئے ہیں۔ پیرس حملوں کے بعد فرانس میں پہلے ہی ایمرجنسی نافذ ہے، تاہم فرانس کے وزیر داخلہ کا کہنا ہے کہ گرجا گھروں پر حملوں کا کوئی خطرہ نہیں۔پیرس حملوں کے بعد بیلجیم میں بھی پہلے سے ہی سیکیورٹی خطرے کا لیول تیسرے درجے پر ہے لیکن اس کے باوجود برسلز میں کرسمس پر لوگوں میں خوب جوش وخروش پایا جاتا ہے۔ نیویارک سمیت امریکا کے مختلف شہروں میں ہوائی اڈوں پر کرسمس کی چھٹیوں پر گھروں کو واپس آنے والے شہریوں کا رش بڑھ گیا ہے۔ حکام کے مطابق ان چھٹیوں کے دوران لگ بھگ 10کروڑ سے زائد شہری سفر کریں گے۔