لودھراں(نیوزڈیسک)قومی اسمبلی کے حلقہ این اے 154کے غیر سرکاری نتائج کے مطابق جہانگیر ترین نے صدیق بلوچ کو 43806ووٹوں سے شکست دے دی ہے۔تفصیلات کے مطابق این اے 154 کے تمام پولنگ سٹیشنز کے غیر سرکاری نتائج موصول ہو گئے ہیں جس کے مطابق پاکستان تحریک انصاف کے امیدوار جہانگیر ترین نے ایک لاکھ 17 ہزار 53 ووٹ حاصل کیے جبکہ نواز لیگ کے صدیق بلوچ 73ہزار 247 ووٹ حاصل کرنے میں ہی کامیا ب ہو سکے۔تفصیلات کے مطابق پاکستان تحریک انصاف کے کارکنوں نے لودھراں کے حلقہ این اے 154 میں مختلف مقامات پر جشن منانا اور مٹھائیاں تقسیم کرنا شروع کر دی ہیں۔واضح رہے کہ 2013 کے عام انتخابات میں صدیق بلوچ نے جہانگیر ترین کو بطور آزاد حیثیت سے 10 ہزار ووٹوں سے شکست دی تھی لیکن اس بار صدیق بلوچ ن لیگ کی ٹکٹ پر بھی الیکشن جیتنے میں کامیاب نہیں ہو سکے ہیں۔این اے 154 میں پولنگ صبح 8 بجے سے شام 5 بجے تک بلا تعطل جاری رہی اور اس دوران چار لاکھ 19 ہزار 182ووٹرز نے اپنا حق رائے دہی استعمال کرتے ہوئے اپنے امیدوار کو منتخب کرلیاہے۔پولنگ کے عمل کو پرامن بنانے کیلئے پولیس کے تین ہزار افسران و اہلکار ،1100 رضاکاروں کے علاوہ آرمی کے جوان بھی پولنگ سٹیشنز پر ڈیوٹیاں انجام دیں ۔ حلقہ این اے 154 میں کل 303 پولنگ سٹیشنز بنائے گئے ، جن میں 34 مردانہ ، 34 زنانہ اور 235 مشترکہ پولینگ اسٹیشنز ہوں گے جس میں 47 پولنگ اسٹیشنز کو اے کیٹیگری یعنی حساس ترین قرار دیا گیا تھا جبکہ باقی 256 کو بی کیٹیگری میں رکھا گیا ۔حلقہ میں 4 لاکھ 19 ہزار 182 ووٹرز حق رائے دہی استعمال کیا، 2 لاکھ 28 ہزار 870 مرد ووٹر اور 1 لاکھ 90 ہزار 312 خواتین ووٹرز شامل ہیں۔