اسلام آباد(نیوز ڈیسک) پاکستان تحریک انصاف کے چیئرمین عمران خان نے کہا ہے کہ میرے خلاف جھوٹی ایف آئی آرز کاٹی گئیں، الیکشن کمیشن ایک پارٹی کے ہاتھ باندھ رہا ہے جبکہ دوسری پارٹی کو آزادی دی ہوئی ہے۔2013 میں جن لوگوں نے دھاندلی کرائی ان کو ہٹانے کی بجائے وہی لوگ دوبارہ الیکشن کرارہے ہیں۔عمران خان نے اپنا ووٹ یونین کونسل نمبر 23 بنی گالہ کے وارڈ نمبر 4ماڈل سکول فار بوائزمیں کاسٹ کرنے کے بعد میڈیا سے گفتگو کرتے ہوئے کہا کہ سیالکوٹ جارہاہوں اس لیے جلدی ووٹ کاسٹ کیاہے سیالکوٹ کے لوگوں تک اپنی پارٹی کا منشور پہنچانا میرا حق ہے۔ دنیا کی کسی بھی جمہوریت میں پارٹی سربراہ کو انتخابی مہم چلانے سے نہیں روکا جاتا۔ انہوں نے کہا کہ میرے پاس کسی قسم کے فنڈز نہیں اور نہ ہی کسی قسم کا عہدہ ہے لیکن اس کے باوجود مجھے انتخابی مہم چلانے سے روکنا امپائروں کی ملی بھگت کو واضح کرتا ہے۔