اسلام آباد(نیوز ڈیسک)پاکستان کی تاریخ میں پہلی بار وفاقی دارالحکومت اسلام آباد میں بلدیاتی انتخابات کیلئے پولنگ شروع ہو گئی ہے۔سرکاری ریڈیو کے مطابق اسلام آباد کی50 یونین کونسلوں میں پولنگ کا عمل صبح سات سے شام ساڑھے پانچ بجے تک بغیر کسی وقفے کے جاری رہے گا۔الیکشن کمیشن نے اسلام آباد میں بلدیاتی انتخابات کیلئے ایک کنٹرول روم بھی قائم کیا ہے۔دارالحکومت میں ووٹرز کی کل تعداد چھ لاکھ 76 ہزار سے زائد بتائی گئی ہے۔ اعدادوشمار کے مطابق 2400 سے زائد امیدوار چیئرمین، وائس چیئرمین اور کونسلرز کی نشستوں کے لیے انتخابات میں حصہ لے رہے ہیں۔دارالحکومت کے تعلیمی اداروں میں تعطیل ہے جبکہ سرکاری دفاتر کے ملازمین کو دن دو بجے چھٹی دے دی جائیگی۔الیکشن کمیشن کے مطابق سکیورٹی کی فراہمی کے لیے پولیس کی معاونت کے لئے فوج، رینجرز اور ایف سی کے جوان تعینات کیے گئے ہیں۔انتخابات کے موقع پر 625 فوجی جوانوں اور رینجرز کے 700 اہلکاروں کے علاوہ پولیس بھی تعینات کی جائے گی جبکہ امن وامان برقرار رکھنے میں ایف سی کے 1000 اہلکار بھی علاقے میں موجود ہیں۔حساس ترین پولنگ اسٹیشنز پر ایک رینجر اور 15 پولیس اہلکار تعینات کیے جائیں گے جبکہ حساس پولنگ اسٹیشن پر سات پولیس اہلکار ڈیوٹی دیں گے۔الیکشن کمیشن کے مطابق فوج بھی سریع الحرکت فورس کے طور پر موجود رہے گی۔