اسلام آباد(آن لائن)افغانستان نے پاکستان کیساتھ مذاکرات بحال کرنے کا فیصلہ کرلیا، افغان صدر نے فیصلہ اسفندریارولی ، محمود خان اچکزئی،افراسیاب خٹک سمیت جرگے کی کوششوں کے بعد کیا ہے، وزیراعظم پاکستان میاں نوازشریف اور افغان صدر اشرف غنی کے درمیان پیر کو پیرس میں ملاقات کا بھی مکان ہے ۔میڈیا رپورٹس کے مطابق افغانستان نے پاکستان سے مذاکرات بحال کرنے کا فیصلہ کرلیا ہے اور افغان صدر اشرف غنی پختون جرگے کے کہنے پر مذاکرات بحال کرنے پر آمادہ ہوئے۔ذرائع نے بتایا کہ اسفندیارولی،محمود خان اچکزئی،افراسیاب خٹک نے گزشتہ روزاشرف غنی سے ملاقات کی جس میں پاک افغان مذاکرات کی بحالی ، افغانستان میں امن و امان کی صورتحال سمیت خطے کے اہم امور پر تبادلہ خیال کیا گیا ،افغان صدرنے پاکستانی پختون جرگے سے ملاقات کے بعد مذاکرات بحالی کا فیصلہ کیا۔ذرائع نے مزید بتایا کہ وزیراعظم نوازشریف اورافغان صدراشرف غنی کی پیر کو پیرس میں ملاقات کا بھی امکان ہے ۔واضح رہے کہ دورہ افغانستان سے قبل اسفند یارولی نے وزیراعظم سے طویل ملاقات کی تھی جبکہ افغان حکومت نے ستمبرمیں قندوزحملے کے بعد پاکستان سے مذاکرات روک دیے تھے۔