اسلام آباد (آن لائن) سابق چیف جسٹس جسٹٰس افتخار محمد چودھری نے نئی سیاسی جماعت کے اعلان سے قبل میڈیا میں اشتہار بازی کے لئے میڈیا کو خطوط ارسال کرنا شروع کر دیئے ۔ دوسرے مرحلے میں معروف روزنامے میں باقاعدہ کالم بھی لکھیں گے ۔ اس حوالے سے بعض اخبارات سے بات چیت جاری ہے ۔ 25 دسمبر 2015 کو نئی سیاسی جماعت کا اعلان کیا جائے گا ۔ ذرائع نے آن لائن کو بتایا ہے کہ سابق چیف جسٹس افتخار محمد چودھری نے سیاسی جماعت کے اعلان کی باقاعدہ تیاریاں شروع کر دی ہیں پارٹی پرچم بھی تیار کیا جا رہا ہے جس پر ترازو کا بھی نشان ثبت ہو گا ۔ ذرائع کا کہنا ہے کہ نئے پارٹی پرچم کی تیاری کے لئے دو ہفتے قبل ہی ہدایت جاری کی گئی تھی رواں ہفتے پرچم پیش کیا جائے گا جس کی باقاعدہ منظوری سابق چیف جسٹس خود دیں گے ۔