اسلام آباد(آن لائن ) وفاقی دارلحکومت میں آج پیر کو ہونے والے انتخابات کے دوران سکیورٹی صورتحال کو یقینی بنانے کے لیے اسلام آباد پولیس کی جانب سے سکیورٹی فورسز کے اہلکاروں اور افسروں کو 4ہزار خصوصی پیکج والی موبائل سمز فراہم کر دی گئی ہیں ، خصوصی سمز کی مدد سے افسران اور اہلکارآپس میں رابطے میں رہیں گے اور انکی کی کمانڈ اینڈ کنٹرول روم سے جی پی آر ایس کے زریعے سے ڈیوٹی کی لوکیشن مانٹیر کی جائے گی۔ تفصیلات کے مطابق اتوار کے روز اسلام آباد پولیس کی جانب سے الیکشن ڈیوٹی پر تعینات سکیورٹی فورسز کے اہلکاروں اور افسروں کو 4ہزار سے زائد خصوصی موبائل سمز فراہم کی گئی ہیں ،موبائل سمز میں فری کال اور میسج کی سہولت دی گئی ہے جسکی وجہ سے افسران اور اہلکار لمحہ با لحہ ایک دوسرے سے رابطے میں رہیں گے ، خصوصی پیکج والی سمز پولیس، ایف سی ، سپیشل برانچ اور فوجی جوانوں کو فراہم کی گئی ہیں ۔