اسلام آباد(نیوز ڈیسک)چیف الیکشن کمشنر سردار رضا خان نے کہا ہے کہ بلدیاتی انتخاب کے دوران امن وامان پر کوئی سمجھوتا نہیں کیاجائے گا، امید ہے انتظامیہ اوردیگر ادارے بھرپور کردار ادا کریں گے۔اسلام آباد میں چیف الیکشن کمشنر سردار رضا خان کی زیر صدارت الیکشن کمیشن آف پاکستان کا جائزہ اجلاس ہوا۔اجلاس کو بریفنگ دیتے ہوئے آئی جی پنجاب مشتاق سکھیرا کا کہنا تھا کہ پنجاب میں فوج کی 44 اور رینجرز کی 8کمپنیاں تعینات ہوں گی، جبکہ پولیس کے ایک لاکھ 17 ہزار سیکورٹی اہلکار تعینات ہوں گے۔آئی جی پنجاب مشتاق سکھیرا نے مزید کہا کہ پنجاب میں بلدیاتی انتخابات کےلئے سیکیورٹی انتظامات مکمل ہیں،حساس پولنگ اسٹیشنز پر دگنی فورس تعینات ہوگی۔ انہوں نے بتایا کہ پولیس اہلکار پولنگ اسٹیشن سمیت کوئیک رسپانس فورس کے طور پر موجود ہوں گے،انتخابات کے پہلے اور دوسرے مرحلے میں بھی سیکیورٹی کے بہترین انتظامات کئے گئے۔