ڈبلن(آن لائن)سمارٹ فون اور کمپیوٹر بنانے والی امریکی کمپنی ”ایپل“ نے آئرلینڈ میں سال 2017 ءکے وسط تک مزید ایک ہزار ملازمتیں فراہم کرنے کا اعلان کیا ہے۔ میڈیا رپورٹس کے مطابق ایپل کا یورپی ہیڈکورٹرز آئرلینڈ کے جنوبی شہر کورک میں ہے جہاں ایپل ملازمین کی تعداد 5 ہزار ہے۔رپورٹ کے مطابق ایپل کے چیف ایگزیکٹو ٹم کک نے ٹرینیٹی کالج ڈبلن یونیورسٹی میں ایک لیکچر کے دوران کہا کہ ہم اگلے ڈیڑھ سال میں آئرلینڈ میں ایپل ملازمین کی تعداد بڑھا کر 6 ہزار کرنا چاہتے ہیں۔ انہوں نے کہا کہ یہ اضافہ یورپ میں ہمارے ملازمین کی تعداد کا ایک چوتھائی ہے اور ہم اس میں مزد اضافہ جاری رکھیں گے۔ کک نے آئرش وزیراعظم سے بھی ملاقات کی۔ ملاقات کے دوران آئرش وزیراعظم نے کہا کہ ایپل کا مزید ملازمتیں فراہم کرنے کا منصوبہ آئرلینڈ کی اقتصادی بحالی کا مظہر ہے۔