میانوالی(نیوز ڈیسک)پاکستان تریک انصاف کے چیئرمین عمران خان کا کہنا ہے کہ کسان مررہے ہیں ،حکومت نے 150ارب تین گنا مہنگی میٹرو پر خرچ کر دیئے اور ساتھ ساتھ کروڑوں روپے کے اشتہارات چلا دیئے جن پر دونوں بھائیوں کی شکلیں لگی ہوتی ہیں۔غریب قوم کے اربوں روپے اپنی تشہیر پر خرچ کر رہے ہیں، نندی پور پاورپراجیکٹ چلا نہیں لیکن اربوں کے اشتہار چلے گئے۔انہوں نے کہا کہ خیبرپختونخوا میں آپ کو کسی بھی سرکاری کام پر عمران خان کی تصویر نظر نہیں آئے گی۔انہوں نے کہا کیونکہ عمران خان نے اللہ کو جواب دینا ہے اس لیئے قوم کا پیسہ خود پر نہیں لگاتا۔تفصیلات کے مطابق بلدیاتی انتخابات کی مہم کے سلسلے میں میانوالی کے علاقے موسیٰ خیل کا دورہ کیا جہاں عوام سے خطاب کرتے ہوئے ان کا کہناتھا کہ خرچے بڑھ گئے ہیں پیدوار کی قیمت نہیں ملتی ،محنت کش کسان تباہ ہو کر رہ گئے ہیں۔بجلی کے نرخ 24روپے فی یونٹ کی بلند شرح تک پہنچے ہوئے ہیں اس کے بر عکس ہندوستان میں ٹیوب ویل کے اوپر فی یونٹ بجلی کی قیمت 57پیسے ہے۔بھارتی حکومت اپنے کسانوں کا خیال رکھتی ہے ،بیج تیار کر کے دیتی ہے اور کیڑے مار ادویات سستے داموں دیتی ہے جس کی وجہ سے پاکستانی کسان کے مقابلے میں بھارتی کسان زیادہ خوشحال ہے۔انہوں نے کہا کہ پاکستان میں غربت بڑھ رہی ہے ،خوراک پوری نہیں ہوتی لیکن میاں صاحب کو کسانوں کی کوئی فکر نہیں ہے۔انہوں نے کہا کہ میانوالی کے لوگو ایک بار پھر میری لاج رکھنا اور بلے پر ہی مہر لگانا۔انہوں نے کہا کہ میاں صاحب کو پیغام دینا ہے کہ اب قوم کو مزید دھوکا نہیں دے سکتے۔قبل ازیں میانوالی پہنچنے پر ان کا شاندار استقبال کیا گیا ،عوام نے عمران خان زندہ باد اور گو نواز گو کا نعرہ لگائے۔