اسلام آباد(نیوزڈیسک)سابق صدر آصف زرداری اور سابق وزیراعظم راجا پرویز اشرف کے دور میں ایوان صدر اور وزیراعظم ہاؤس کے اخراجات میں کروڑوں کی بے ضابطگیوں کا انکشاف ہوا ہے، ان بے ضابطگیوں کی نشاندہی آڈیٹر جنرل آف پاکستان نے کی۔آڈیٹر جنرل کا کہنا ہے کہ سابق وزیراعظم راجا پرویز اشرف نے اپنے مختصر دور میں اعزازیئے کے طور پر 20کروڑ روپے سے زیادہ کی ادائیگیاں کیں، جبکہ ایوان صدر نے ایک سال کے دوران 20کروڑ 70لاکھ کی بے ضابطگیاں کیں۔ان کا کہنا ہے کہ ایوان صدر کے ملازمین نے 70لاکھ روپے کا ٹیکس بھی چوری کیا۔ آڈٹ حکام نے کہا ہے کہ یہ ٹیکس ان ملازمین سے وصول کیا جائے۔
اس وقت صدر کے سیکریٹری جنرل سلمان فاروقی کو مختلف الاؤنسز کی مد میں ایک کروڑ چونسٹھ لاکھ کی بے ضابطہ ادائیگیاں کی گئیں۔ سلمان فاروقی سے یہ رقم وصول کرنے کی ہدایت کی گئی ہے، آئندہ اعزازیئے کی روایت کو ختم کرنے کی سفارش کی گئی ہے