شوال(نیوز ڈیسک)شوال میں پاک فوج کا زمینی آپریشن جاری ہے ، آرمی چیف جنرل راحیل شریف بھی جوانوں کا حوصلہ بڑھانے اور جاری آپریشن کا جائزہ لینے کے لیے شمالی وزیرستان کے علاقہ شوال پہنچ گئے ہیں۔ آرمی چیف جنرل راحیل شریف ہر محاذ پر فوجی جوانوں کے ساتھ نظر آتے ہیں ، آئی ایس پی آر کے مطابق جنرل راحیل شریف اس وقت شوال میں دہشت گردوں کے خلاف جاری جنگ میں پاک فوج کے زمینی آپریشن کا جائزہ لے رہے ہیں۔ دہشت گردوں اور انتہا پسندوں کے ٹھکانوں کو نشانہ لگانے کے ساتھ ساتھ اب شوال میں زمینی کارروائی بھی شروع ہو چکی ہے ، عسکری ذرائع کا کہنا ہے کہ آپریشن ضرب عضب اب آخری مرحلے میں داخل ہو چکا ہے۔ فضائی آپریشن کے ساتھ ساتھ زمینی کارروائی بھی موثر طور پر جاری ہے ، گزشتہ سال 15 جون سے شروع ہونے والے آپریشن میں اب تک تین ہزار دہشت گرد مارے جا چکے ہیں۔ آرمی چیف جنرل راحیل شریف اس سے پہلے بھی کئی مرتبہ محاذوں پر جا چکے ہیں۔