اسلام آباد(نیوزڈیسک) بھارتی وزیر داخلہ راج ناتھ سنگھ کے راجیہ سبھا میں الزامات پر پاکستان نے شدید ردعمل کا اظہار کیا ہے۔ ترجمان دفتر خارجہ قاضی خلیل اللہ کہتے ہیں کہ بھارتی وزیر داخلہ کا بیان خطے کے امن اور سلامتی کیلئے خطرہ ہے۔ ترجمان دفتر خارجہ نے کہا کہ گرداسپور واقعہ میں ملوث افراد کا تعلق پاکستان سے جوڑنے کا بیان افسوسناک ہے۔ حملے کے فوری بعد پاکستان نے واقعہ کی شدید الفاظ میں مذمت کی تھی لیکن اس کے باوجود بھارتی میڈیا اور سرکاری حکام نے الزام تراشی کی روش برقرار رکھی۔ پاکستان ہر قسم کی دہشتگردی کی مذمت کرتا ہے۔ بھارت کو بھی الزام تراشیوں سے گریز کرنا چاہیے۔ ترجمان نے کہا کہ کسی بھی دہشتگردی میں پاکستان کو ملوث کرنے کا سلسلہ بھی بند ہونا چاہیے۔ واضع رہے کہ بھارت کے وزیر داخلہ راج ناتھ سنگھ نے الزام لگایا تھا کہ گورداسپور واقعہ میں ملوث حملہ آور دریائے راوی کے ذریعے بھارتی حدود میں داخل ہوئے۔ خیال رہے کہ بھارت کی جانب سے پہلے دلیل دی گئی تھی کہ حملہ آور کشمیر سے بھارت میں داخل ہوئے، پھر سننے میں آیا کہ حملہ آور شکر گڑھ سے بھارت میں داخل ہوئے اور ان کے پاس چینی اسلحہ سمیت جی پی ایس آلات بھی موجود تھے۔