اسلام آباد(نیوزڈیسک)وفاقی وزیر داخلہ چودھری نثار نے کہا ہے کہ روہنگیا مسلمانوں کی نسل کشی پر عالمی خاموشی افسوس ناک ہے، وزیر اعظم اور پوری کابینہ نے برما میں مسلمانوں کی حالت زار پر تشویش کا اظہار کیا ہے ،عالمی خاموشی نے کئی سوالات کو جنم دیا ہے،وزیر اعظم نے روہنگیا مسلمانوں کی امداد کےلیے کابینہ کمیٹی بھی قائم کر دی ہے۔ وفاقی وزیر داخلہ چودھری نثار نے ایک بیان میں کہا کہ اقوام متحدہ، او آئی سی اور عالمی تنظیمیں روہنگیا مسلمانوں کی نسل کشی پر آنکھیں بند نہ کریں، برما میں مسلمانوں کی نسل کشی پر عالمی خاموشی نے کئی سوالات کو جنم دیا ہے، اس ظلم کی انتہا سے دہشت گردوں کے خلاف جاری کوششیں متاثر ہو ں گی۔ وزیر داخلہ نے کہا کہ برما میں مسلمانوں کے مصائب کا معاملہ 2بار کابینہ میں اٹھایا،وزیر اعظم اور پوری کابینہ نے روہنگیا مسلمانوں کی حالت زار پر تشویش کا اظہار کیا ہے ۔ وزیر اعظم نے روہنگیا مسلمانوں کی امداد کے اقدامات تجویز کرنے کے لئے کابینہ کمیٹی قائم کر دی ہے جو وفاقی وزیر داخلہ ، مشیر خارجہ سرتاج عزیز اور معاون خصوصی طارق فاطمی پر مشتمل ہے۔ وفاقی وزیر داخلہ کے مطابق کابینہ کمیٹی کا پہلا اجلاس اتوار کو ہو گا اور امید ہے کہ حکومت پاکستان اس معاملے پر موثر انداز میں آگے بڑھے گی