اسلام آباد(نیوز ڈیسک) شمالی وزیرستان میں سکیورٹی فورسز کی فضائی کارروائی اور بنو ں میں چیک پوسٹ حملے میں 12 دہشت گرد ہلاک اور 13 زخمی ہوگئے جبکہ فائرنگ کے نتیجے میں ایک سکیورٹی اہلکار شہید ہوگیا۔میڈیا رپورٹس کے مطابق سکیورٹی فورسز نے شمالی وزیرستان کے علاقے دتہ خیل میں شیرانی مداخل کے مقام پرجیٹ طیاروں کی مدد سے دہشت گردوں کے خفیہ ٹھکانوں پر شدید بمباری اور شیلنگ کی جس کے نتیجے میں 9 دہشت گرد ہلاک ہوگئے اور 13 زخمی ہوئے جنہیں حراست میں لے لیا گیا ہے، پولیٹیکل حکام کے مطابق 2 درجن سے زائد دہشت گر د ایک خفیہ ٹھکانے میں دہشت گردانہ کارروائی کیلئے منصوبہ بندی کررہے تھے کہ پاک فوج کے جوانوں نے کارروائی کر کے ان دہشت گردانہ عزائم کو ناکام بنا دیا ہے،کارروائی کے دوران 5خفیہ ٹھکانے میں مکمل طور پر تباہ ہوگئے ہیں جبکہ دہشت گردوں کے زیر استعمال بھاری اسلحہ بھی قبضہ میں لے لیا گیا ہے،سکیورٹی حکام کے مطابق ہلاک اور زخمی دہشت گردوں کا تعلق کالعدم تنظیم تحریک طالبان اور لشکر اسلام سے ہے ۔دوسری جانب بنوں کے علاقے ایف آر میں دہشت گردوں نے چیک پوسٹ پر حملہ کر دیا اور شدید فائرنگ کا تبادلہ ہوا جس کے نتیجے میں3 دہشت گرد ہلاک اورمتعدد فرار ہونے میں کامیاب ہوگئے،فائرنگ کے تبادلے میں ایک سکیورٹی اہلکار شہید ہوگیا،واقعہ کے بعد بھاری تعداد میں سکیورٹی اہلکار جائے وقوعہ پر پہنچ گئے اور علاقے کو گھیرے میں لیکر دہشت گردوں کی تلاش کیلئے سرچ آپریشن شروع کر دیا تاہم آخری اطلاعات تک کسی کی گرفتاری عمل میں نہیں لائی جا سکی۔ادھر جنوبی وزیرستان کے علاقے شکئی گاﺅں میں پولیٹیکل محرر پر نامعلوم افراد نے حملہ کردیا تاہم اس حملے میں پولیٹیکل محرر بال بال بچ گئے اور انہیں محفوظ مقام پر منتقل کر دیا گیا ہے،