اسلام آباد (نیوز ڈیسک) دنیا بھر میں مصنوعی ذہانت (اے آئی) پر مبنی نگرانی کے نظام تیزی سے عام ہو رہے ہیں، جبکہ مختلف مقامات پر اے آئی ٹیکنالوجی سے لیس سی سی ٹی وی کیمروں کا استعمال بھی بڑھتا جا رہا ہے۔
ڈیجیٹل نگرانی کے بڑھتے ہوئے رجحان کے درمیان ایک شخص نے ایسی شرٹ تیار کی ہے جو مبینہ طور پر اے آئی سے چلنے والے کیمروں کے لیے اسے پہننے والے شخص کی شناخت مشکل بنا دیتی ہے۔
اس شرٹ کو تیار کرنے والے سائمن ویکرٹ کے مطابق جدید اے آئی سسٹمز بڑی تعداد میں تصاویر سے تربیت حاصل کرکے لوگوں کو شناخت کرتے ہیں۔ یہ نظام کسی فرد کی شناخت کے لیے مخصوص بصری پیٹرنز اور ظاہری خصوصیات کو استعمال کرتے ہیں۔
سائمن ویکرٹ کا کہنا ہے کہ یہی عمل اے آئی نگرانی کے نظام کی ایک کمزوری بھی بن سکتا ہے، جسے مدنظر رکھتے ہوئے انہوں نے ’’ڈیجیٹل کیموفلاج‘‘ نامی شرٹ کا ڈیزائن تیار کیا۔
ان کے مطابق شرٹ پر موجود مخصوص اور غیر معمولی پیٹرنز اے آئی سسٹمز کو اس قدر الجھا دیتے ہیں کہ کیمرے کے لیے یہ طے کرنا مشکل ہوجاتا ہے کہ سامنے موجود چیز انسان ہے یا نہیں۔
سائمن ویکرٹ نے وضاحت کی کہ کسی مشین کی نظر سے بچنے کے لیے یہ سمجھنا ضروری ہے کہ وہ مشین کن چیزوں کو شناخت کرنے سے قاصر ہے، اسی تصور کو سامنے رکھتے ہوئے یہ ڈیزائن تیار کیا گیا۔
دیکھنے میں یہ شرٹ روایتی لباس سے خاصی مختلف اور غیر معمولی محسوس ہوتی ہے۔ اس پر موجود رنگ برنگا ڈیزائن بظاہر عجیب دکھائی دیتا ہے، تاہم اسے اے آئی پر مبنی نگرانی کے نظام کو متاثر کرنے کے مقصد سے تیار کیا گیا ہے۔
سائمن ویکرٹ کے مطابق انہوں نے مختلف اے آئی سسٹمز پر اس ڈیزائن کی آزمائش کی، جہاں ان نظاموں کو شرٹ پہننے والے شخص کی شناخت کرنے میں مشکلات کا سامنا کرنا پڑا۔
