لاہور: وزیراعظم میاں محمد نواز شریف نے اتک بار پھر کہا ہے کہ عوام نے انہیں 5 سال کا مینڈیٹ دیا ہے اور چند لوگوں کی خواہشات سے حکومت نہیں بدلی جاسکتی۔ لاہور میں وزیراعظم نوازشریف کی زیرصدارت اعلیٰ سطح کا اجلاس ہوا جس میں سیلاب متاثرین کی امداداورپنجاب کے ترقیاتی منصوبوں پرغور کیا گیا۔ اس موقع پر انہوں نے انتظامیہ کو ہدایت کی کہ ترقیاتی منصوبوں کو تیزرفتاری سے مکمل کیا جائے۔ اجلاس کے دوران وزیر اعظم نے کہا کہ عوام نے انہیں 5 سال کا مینڈیٹ دیا ہے چند لوگوں کی خواہشات سے حکومت نہیں بدلتی، ملک کی ترقی اور خوشحالی کی راہ میں کوئی رکاوٹ حائل نہیں ہوسکتی،موجودہ حکومت عوام کی فلاح اور بھلائی کے منصوبوں میں کوئی کسرنہیں چھوڑے گی۔