کراچی (نیوز ڈیسک )پاکستان اسٹیل کی موجودہ انتظامیہ مختلف النوع اقسام کی مصنوعات کی پیداوار میں اضافے کے لئے تیزی سے پیش رفت کررہی ہے۔پاکستان اسٹیل کے اہم ترین کارخانے ”کولڈ رولنگ مل“ میں مختلف سائز کی ”فارمڈ سیکشن مصنوعات“ کی پیداوار بھی شروع کردی گئی ہے۔ پاکستان اسٹیل کے اِس اہم ترین کارخانے سے فارمڈ سیکشن مصنوعات کی پیداوار کا20 سال بعد آغاز کیا گیا۔یاد رہے کہ 20 سال قبل بھی لاہور اور اسلام آباد موٹرویز پروجیکٹ کی تعمیر میں پاکستان اسٹیل کی فورمڈ سیکشن مصنوعات کا استعمال کرکے ایک نیا سنگ میل عبور کیا تھا۔ترجمان پاکستان اسٹیل نے بتایا کہ پاکستان اسٹیل کے تیارکردہ فارمڈ سیکشن مصنوعات کی آٹو موبائل،ٹرالرز، ٹریکٹر ز اور ٹرک سازی کے عمل میں انتہائی مفید اور معاشی اعتبار سے معاون ثابت ہوں گی۔ ادارے کی اِن مصنوعات کو موٹرویز کی تعمیرات، ریلویز، مینوفیکچرنگ کی صنعتوں خصوصاً صنعتوں کی چھت کے انفراسٹرکچر ، ایگری کلچر کی صنعت اور اسٹیل کی دیگر اشیاءبنانے اور تیار کرنے میں استعمال کیا جاسکے گا۔ پاکستان اسٹیل کی یہ اہم مصنوعات تعمیراتی کاموں کی مضبوطی کے لحاظ سے نہ صرف اہمیت اور افادیت کی حامل ہیں بلکہ اس کے استعمال سے 6 سے30 فیصد فولاد کی بچت بھی ممکن بنائی جاسکتی ہے۔ یہاں یہ بات بھی قابل ذکر ہے کہ فارمڈ سیکشن مصنوعات معاشی نقطہءنظر سے بھی بہت فائدے مند ہیں اور آٹو موبائل کی صنعتوں میں گاڑیوں کے استعمال میں توانائی(Fuel ) کی بچت بھی ممکن ہوسکے گی۔ترجمان نے مزید بتایا کہ پاکستان اسٹیل کی موجودہ انتظامیہ ملک کے سب سے بڑے صنعتی ادارے کے مالی استحکام کے لئے اس کے اہم کارخانوں کو فعال بناکر مختلف اقسام کی اسٹیل مصنوعات کی پیداوار کے حصول کے لئے مسلسل کوشاں ہے۔ اِن کاوشوں میں پاکستان اسٹیل کے باصلاحیت انجینئرز اور تجربہ کار ہنر مند موجودہ انتظامیہ پاکستان اسٹیل کے شانہ بشانہ مصروفِ عمل ہیں۔ یاد رہے کہ پاکستان اسٹیل کے کارخانوں کی ضروری مرمت اور دیکھ بھال کے کاموں سے گذشتہ کئی برسوں سے عدم توجہی برتی جارہی تھی لیکن موجودہ انتظامیہ نے کئی برسوں سے بند کارخانوں کی بحالی کے کام اپنے وسائل کو بروئے کار لاکر اپنی شاندار پیشہ وارانہ کردگی کا مظاہرہ کیا ہے ۔ انتظامیہ پاکستان اسٹیل کو توقع ہے کہ اِن کاوشوں سے یہ قومی صنعتی ادارہ جلد دوبارہ اپنا کھویا ہوا وقار حاصل کرنے میں کامیاب ہوگا۔