اسلام آباد (نیوز ڈیسک) چیف جسٹس جواد ایس خواجہ آج اپنے عہدے سے سبکدوش ہوجائیں گے۔ ان کی جگہ نئے چیف جسٹس انور ظہیر جمالی کل عہدے کا حلف لیں گے۔ صدر مملکت ممنون حسین نومنتخب چیف جسٹس سے حلف لیں گے۔ جسٹس جواد ایس خواجہ نے 24 روز تک فرائض انجام دئیے وہ ملک کے 23ویں چیف جسٹس تھے ان کے بعد 10 ستمبر کو نئے چیف جسٹس انور ظہیر جمالی اپنے عہدے کا حلف اٹھائیں گے۔ جو تقریباً 15ماہ تک چیف جسٹس رہیں گے۔ صدر مملکت نے 26اگست کو جسٹس انور ظہیر جمالی کی بطور چیف جسٹس تقرری کی منظوری دی تھی۔ چیف جسٹس انور ظہیر جمالی کے چیف جسٹس بننے پر جسٹس میاں ثاقب نثار سپریم کورٹ کے سینئر ترین جج بن جائیں گے۔چیف جسٹس جسٹس جواد ایس خواجہ کی ریٹائرمنٹ سے متعلق فل کورٹ ریفرنس آج سپریم کورٹ میں ہوگا جس میں سپریم کورٹ کے تمام 16ججز، ریٹائرڈ جسٹس صاحبان‘ اٹارنی جنرل، رجسٹرار سپریم کورٹ اور سنیئر وکلا شرکت کریں گے جب نئے چیف جسٹس انور ظہیر جمالی کے اعزاز میں عشائیہ دیا جائے گا۔واضح رہے کہ گزشتہ روز چیف جسٹس جوادایس خواجہ نے ایک ہی دن میں بڑی تعداد میں فیصلے دیکرایک ریکارڈ قائم کردیا۔ انہوں نے منگل کے روز قومی زبان ا±ردوکے نفاذ، تلور پرندے کا غیرقانونی شکار، پولیس اصلاحات کیس سمیت 8 فیصلے جاری کئے جوکہ ایک ریکارڈ ہے۔