اسلام آباد(نیوزڈیسک)گزشتہ سال بھی 13اور 14اگست کو ملک کو سیاسی بحران کا سامنا تھا،اس سال بھی ایم کیوایم کے استعفوں کی صورت میں سیاسی بحرانپیدا ہوا ہے،لیکن اس کی شدت کم ہے۔پچھلے سال 13اور 14اگست کی درمیانی رات پاکستان سیاسی تصادم کی انتہا پر تھا۔ عمران خان اور طاہرالقادری نے 14اگست سے اسلام آباد کی جانب لانگ مارچ کا اعلان کر رکھا تھا، جس کی تیاریاں 13اگست کی رات ہی سے جاری تھیں۔ اس سال بھی 13اگست کا دن ایک اور سیاسی بحران پر تبصروں کے ساتھ طلوع ہوا۔ یہ بحران ایم کیو ایم کے استعفوں سے شروع ہوا تھا۔ پچھلے سال 14اگست کی صبح حکومت نے دونوں کو لانگ مارچ نکالنے سے روک دیا، لیکن عوامی تحریک کی جانب سے ایم کیو ایم اور تحریک انصاف کی جانب سے جماعت اسلامی نے مارچ پرامن رہنے کی ضمانت دی اور پھر مارچ لاہور سے جی ٹی روڈ پر رواں دواں ہو گیا۔ آج بھی 14اگست ہے، جوڈیشل کمیشن نے نئے انتخابات کرانے کا مطالبہ مسترد کر دیا ہے۔ تحریک انصاف کے استعفوں کا بحران ختم ہو چکا ہے، مگر اب ایم کیو ایم کے استعفوں کی صورت میں ایک اور بحران جنم لے چکا ہے۔ اس بحران کے ساتھ فی الحال اسٹریٹ پاور کے ذریعے مطالبات منوانے کا کوئی اعلان نہیں کیا۔ پچھلے سال اگست میں شروع ہونے والا بحران کئی مہینے برقرار رہا، دیکھیے یہ نیا بحران کتنے روز برقرار رہے گا۔کیونکہ ایم کیوایم نے بھی جشن آزادی سے دوروزقبل پارلیمنٹ اورسندھ اسمبلی میں استعفے جمع کرادیئے ہیں ۔عمران خان کواسمبلی میں واپس لانے کے ایک سال بعد ایم کیوایم نے مسلم لیگ(ن) کی حکومت کے لئے ایک نیامحاذکھول دیاہے ۔