راولپنڈی (نیوزڈیسک)مانسہرہ ہیلی کاپٹر حادثے کے تمام بارہ شہداء کی نماز جنازہ ادا کر دی گئی ، آرمی چیف جنرل راحیل شریف ، نیول چیف ایڈمرل ذکاء اللہ، ائیر چیف سہیل امان اور شہداء کے لواحقین نے شرکت کی۔ پاک فوج کے شعبہ تعلقات عامہ کے مطابق مانسہرہ کے قریب ہیلی کاپٹر حادثہ میں شہید ہونے والوں کی نماز جنازہ چکلالہ راولپنڈی میں ادا کر دی گئی ہے۔ چیف آف آرمی سٹاف جنرل راحیل شریف ، پاک فضائیہ کے سربراہ ائیر چیف مارشل سہیل امان ، چیف آف نیول سٹاف ایڈمرل ذکاء اللہ نے شرکت کی۔ شہداء کے لواحقین ، مسلح افواج کے سینئر افسران اور عام شہریوں کی بڑی تعداد بھی نماز جنازہ میں شریک تھی۔ نماز جنازہ کے بعد آرمی چیف شہداء کے لواحقین سے بھی ملے ۔ آئی ایس پی آر کے مطابق جن شہداء کا ڈی این اے ٹیسٹ مکمل ہو گیا ہے ، ان کے جسد خاکی آبائی علاقوں کو روانہ کر دیئے گئے ہیں۔