اسلام آباد(نیوز ڈیسک)وزیردفاع خواجہ آصف کا کہنا ہے کہ افغان طالبان کے امیر ملا عمر کا انتقال پاکستانی سزمین پر ہوا اور نہ ہی تدفین۔قومی اسمبلی کے اجلاس کے دوران پالیسی بیان دیتے ہوئے خواجہ آصف کا کہنا تھا کہ پاکستانی سرزمین پر ملا عمر کے انتقال میں کوئی صداقت نہیں، افغان طالبان کے امیر کا انتقال پاکستان میں ہوا اور نہ تدفین، پاکستان افغانستان میں امن چاہتا ہے اس لئے اس کے لئے مفاہمتی عمل میں بھرپور کردار ادا کریں گے اور اگر افغان طالبان کا مذاکراتی عمل اچھے نوٹ پر ختم ہوتو یہ پاکستان کی بڑی کامیابی ہوگی۔وزیردفاع کا کہنا تھا کہ افغان طالبان میں لیڈرشپ کا جھگڑا ان کا آپس کا معاملہ ہے تاہم ہم طالبان کے جھگڑے میں اس وقت نہیں پڑرہے اور چاہتے ہیں کہ افغان دھڑے قیادت کا مسئلہ حل کر کے مذاکرات کی ٹیبل پر آئیں۔