کراچی (نیوزڈیسک)وزیر دفاع خواجہ آصف نے انکشاف کیا ہے کہ دھرنے میں دو سابق جنرلز کا ہاتھ تھا۔ ضرورت محسوس ہوئی تو ثبوت بھی دیں گے۔ وقت ان سے حساب لے گا۔ ایک نجی ٹی وی کے پروگرا م میں گفتگوکرتے ہوئے وزیر دفاع خواجہ آصف نے کہا کہ انہوں نے دھرنے کے حوالے سے دو سابق جرنیلوں کا نام لیا تھا۔ لیفٹیننٹ جنرل (ر) احمد شجاع پاشا تحریک انصاف کے ریکروٹمنٹ آفیسر بھی رہے۔ شجاع پاشا نے آن ڈیوٹی ہوتے ہوئے سیاسی عزائم پر کام کیا۔ خواجہ آصف کا کہنا تھا کہ اللہ تعالیٰ نے دھرنے سے نکالا، جوڈیشل کمیشن میں بھی سرخرو ہوئے، اب آگے بڑھنا چاہیے۔ جو لوگ دھرنے کے پیچھے تھے، وقت ان سے حساب لے گا۔ وزیر دفاع نے مزید کہا کہ سول ملٹری تعلقات میں اونچ نیچ آتی رہتی ہے تاہم موجودہ سیاسی اور عسکری قیادت میں مثالی تعاون ہے اور قومی معاملات پر دونوں ایک صفحے پر ہیں۔ خواجہ آصف کا کہنا تھا کہ پرویز مشرف پر مقدمہ ہم سے پہلے بنایا گیا تھا۔ انہوں نے کامران خان کو پروگرام شروع کرنے پر مبارکباد بھی دی۔