تل ابیب(این این آئی)اسرائیلی وزیر دفاع بینی گینٹز نے خبردار کیا ہے کہ ہم حزب اللہ، لبنان کی فوج اور حکومت کو مشورہ دیتے ہیں کہ وہ ہمارا امتحان نہ لیں۔میڈیارپورٹس کے مطابق یہ بیان حزب اللہ ملیشیا کے جمعہ کو اس بات کے اس دعوے کے بعد سامنے آیا کہ اس نے اسرائیل پر 15 سے زائد میزائل داغے ،

انہوں نے مزید کہا کہ لبنان میں صورتحال پہلے ہی تشویشناک ہے اور ہم اسے مزید خراب کر سکتے ہیں۔انہوں نے اس بات پر بھی زور دیا کہ وہ جنگ بندی کو پرسکون طریقے سے آگے بڑھانا چاہتے ہیں۔ تل ابیب کو لبنان میں کوئی دلچسپی نہیں ہے۔ انہوں نے مزید کہا کہ ہم حزب اللہ کو اپنے ساتھ گڑبڑ کرنے کی اجازت نہیں دیں گے۔اس تناظر میں اسرائیلی وزیر دفاع اور ان کے امریکی ہم منصب نے لبنان کی صورت حال پر تبادلہ خیال کیا ہے۔گینٹز نے اس بات پر زور دیا کہ ایران کی مذموم سرگرمیوں کو روکنے کے لیے اقدامات کیے جانے چاہئیں۔جمعہ کو اسرائیلی فوج نے کہا تھا کہ وہ موجودہ حالات کے مطابق کسی بھی فوجی آپریشن کے لیے تیار ہے۔انہوں نے کہا کہ ہم اپنی خودمختاری اور سلامتی کی خلاف ورزی کو قبول نہیں کریں گے۔ ہم اسرائیلی شہریوں کے خلاف کسی بھی جارحیت کو برداشت نہیں کریں گے۔اسرائیلی فوج کے ترجمان نے اس بات پر بھی زور دیا کہ حزب اللہ لبنانیوں کو اپنی دہشت گرد کارروائیوں کے لیے انسانی ڈھال کے طور پر استعمال کرتی ہے۔جمعہ کو حزب اللہ ملیشیا نے اسرائیل پر 15 سے زائد راکٹ داغنے کا اعتراف کرتے ہوئے دعوی کیا کہ یہ آپریشن تل ابیب پر بمباری کا جواب ہے۔