اسلام آباد(نیوزڈیسک)تحریک انصاف کے چیئرمین عمران خان نے کہا ہے کہ شہباز شریف نےخود تسلیم کیا کہ انہوں نے دسمبر 2014ءمیں 5ارب 24کروڑ قرض واپس کیا، انہیں نادہندہ ہونے کے باجود 2013ء کا الیکشن کیسے لڑنے دیا گیا اور ظاہری اثاثہ جات سے زائد 3ارب روپے کہاں سے ادا کیے؟ چیئرمین تحریک انصاف عمران خان نے سماجی رابطے کی ویب سائٹ پر ایک پیغام میں کہا ہے کہ الیکشن کمیشن کے مطابق 2013ءمیں نواز شریف کے اثاثہ جات 1ارب 82کروڑ روپے جبکہ شہباز شریف کے اثاثہ جات 142ملین روپے تھے۔ شہباز شریف نےخود تسلیم کیا کہ انہوں نے دسمبر 2014ءمیں 5ارب 24کروڑ روپے قرض واپس کیا، شریف برادران نے 3ارب روپے اضافی کہاں سے ادا کیے اور ڈیفالٹر کو 2013ءکے انتخابات لڑنے کی اجازت کیسے دی گئی؟ عمران خان کا کہنا ہے کہ مسلم لیگ ن نے پاکستان میں کرکٹ کو سیاسی بھرتیوں سے تباہ کیا، ہاکی کی تباہی میں بھی سیاسی مداخلت کارفرما ہے، کرکٹ اور ہاکی کو سیاسی مداخلت سے پاک کیا جائے۔