لاہور(آن لائن)قومی ٹیم کے کپتان بابراعظم نے نامناسب سلوک اور مار پیٹ کے الزامات عائد کرنے والی خاتون کے اندراج مقدمے کی درخواست پر اپنے وکیل کا وکالت نامہ جمع کروادیا۔ قومی ٹیم کے کھلاڑی بابراعظم کی جانب سے مبشر سجاد ایڈووکیٹ نے عدالت میں وکالت نامہ جمع کروایا۔

پولیس نے عدالت میں نامکمل رپورٹ جمع کروا دی ہے جس میں کہا گیا ہے کہ مذکورہ خاتون کو پوچھ گچھ کے لیے تھانے میں بلوایا تھا لیکن وہ پیش نہیں ہوئی۔پولیس نے عدالت سے استدعا کرتے ہوئے کہا کہ دونوں پارٹیوں سے آمنا سامنا کروانا درکار ہے لہذا عدالت مکمل رپورٹ کے لیے مہلت فراہم کرے۔ عدالت نے پولیس کی استدعا منظور کرتے ہوئے کیس کی سماعت 14 دسمبر تک ملتوی کردی۔ واضح رہے کہ چند روز قبل ایک پریس کانفرنس کے دوران حمیزہ مختار نامی خاتون نے بابر اعظم پر جنسی زیادتی، تشدد، شادی کا جھانسہ دے کر دھوکا دینے اور مال بٹورنے کے سنگین نوعیت کے الزامات عائد کیے تھے۔قومی ٹیم کے کپتان اس وقت سکواڈ کے ساتھ نیوزی لینڈ میں قرنطینہ مکمل کر رہے ہیں، کم گو اور شرمیلے بابراعظم پر خاتون کے الزامات نے سوشل میڈیا پر کھلبلی مچا دی، بیشتر لوگ بابراعظم کے حق میں جب کہ کئی مخالفت میں بھی تبصرے کررہے ہیں ۔دوسری جانب پی سی بی نے خاتون کے الزامات کو بابراعظم کا ذاتی مسئلہ قرار دیا ہے۔