اسلام آباد (نیوز ڈیسک) بی بی سی کی رپورٹ کے حوالے سے پیدا شدہ صورتحال پر غور کیلئے آج وزارت داخلہ میں اہم اجلاس ہو گا۔ حکومت پاکستان برطانیہ سے الطاف حسین کی سیاسی سرگرمیوں پر پابندی کی درخواست کیلئے مراسلہ لکھنے کا فیصلہ بھی کر سکتی ہے۔ نجی ٹی ویکے مطابق بی بی سی کی ایم کیو ایم کے حوالے سے رپورٹ شائع ہونے کے بعد وزارت داخلہ نے صورتحال پر غور کیلئے اجلاس طلب کر لیا ہے۔ اجلاس میں یہ اہم فیصلہ بھی متوقع ہے کہ حکومت پاکستان برطانیہ سے الطاف حسین کی سیاسی سرگرمیوں پر پابندی کی درخواست کیلئے مراسلہ لکھنے کا فیصلہ کر سکتی ہے۔ برطانیہ سے انٹیلی جنس شیئرنگ کے حوالے سے وزیر داخلہ پہلے بھی اشارہ دے چکے ہیں۔ اجلاس کے بعد وزیر داخلہ چودھری نثار علی خان کی جانب سے وزیراعظم کو بریفنگ بھی دیئے جانے کا امکان ہے۔ ذرائع نے بتایا ہے کہ وزارت داخلہ نے بی بی سی کی رپورٹ کی روشنی میں تحقیقات شروع کرنے کا بھی فیصلہ کیا ہے۔ اس حوالے سے کراچی رینجرز اور ایف آئی اے سے معاملے کی تحقیقات کروائی جائیں گی جبکہ خفیہ ادارے بھارت سے معاونت اور تربیت حاصل کرنے کے الزامات کی الگ سے تحقیقات کریں گے۔