اسلام آباد(نیوزڈیسک) وزیراعظم نوازشریف کا کہنا ہےکہ پاک فوج کے خلاف بیان پر خاموش نہیں رہ سکتے۔ایک نجی ٹی وی کے مطابق وزیراعظم نوازشریف اور آرمی چیف کے درمیان گزشتہ روز ٹیلی فونک رابطہ ہوا جس میں وزیراعظم نے سابق صدر آصف زرداری کی جانب سے پاک فوج سے متعلق دیئے گئے بیان پر گفتگو کی۔ ذرائع کا کہنا ہے کہ آرمی چیف جنرل راحیل شریف روس کے دورے پر ہیں اور وزیراعظم نوازشریف نے ان سے بذریعہ ٹیلی فون رابطہ کیا۔ذرائع کے مطابق آرمی چیف سے گفتگو میں وزیراعظم کا کہنا تھا کہ پاک فوج ملک کے لیے لڑرہی ہے اس کے خلاف بیان پر خاموش نہیں رہ سکتے ہیں اور یہ نہیں ہوسکتا کہ کوئی پاک فوج کے خلاف بیان دے اور ہم چپ رہیں۔ ذرائع کا کہنا تھا کہ اس موقع پر وزیراعظم اور آرمی چیف نے آصف زرداری کے بیان پر وزیرداخلہ چوہدری نثار کے ردعمل کو بھی سراہا۔ذرائع کے مطابق گفتگو میں پاک فوج کیخلاف بیان پرحکومت کے ردعمل پر اتفاق کرلیاگیا اور اس سلسلے میں جلد ہی اقدامات اٹھائے جائیںگے۔