پشاور(نیوزڈیسک) بلدیاتی الیکشن میں دن کا آغاز ہی ہنگامے سے ہوا, تلخ کلامی ، مار پیٹ اور لڑائی جھگڑے معمول بنے رہے جس سے پولنگ کا عمل بھی متاثر ہوا۔ نوشہرہ میں امیدواروں کے حامی حد سے گزر گئے اور پولنگ اسٹیشن نمبر 2 پر ہنگامہ آرائی کے بعد بیلٹ پیپر پھاڑ کر بیلٹ باکس توڑ دیے یہی نہیں بلکہ بیلٹ پیپرز کو ریزہ ریزہ کر کے ہوا میں اچھال دیا۔ مردان کے گڑھی اسماعیل زئی علاقے میں ووٹر نے بیلٹ باکس توڑ ڈالا۔ قومی وطن پارٹی کے کارکنوں نے چارسدہ میں ہائی اسکول تنگی پولنگ اسٹیشن پر دھاوا بول دیا۔ ہاتھا پائی اور جھگڑے میں پولیس اہلکار زخمی ہو گیا۔ ڈیرہ اسماعیل خان میں پولنگ اسٹیشن کی بجلی کیا بند ہوئی گویا ووٹرز کے وارے نیارے ہو گئے اور بوتھ کے باہر کھلے عام ٹھپے لگائے۔ مردان میں قانون کو مذاق بنا دیا گیا اور سرعام اسلحے کی نمائش کی گئی ایک ووٹر نے تو موبائل سے بیلٹ پیپر کی تصویر بھی بنائی۔ جعلی ووٹ ڈالنے پر ایبٹ آباد میں پولیس اہلکار دھر لیا گیا۔ چمہڈ میں تحریک انصاف اور ن لیگ کے کارکنوں کے جھگڑے میں دو افراد زخمی ہو گئے۔ حالات بہتر نہ ہونے پر فوج کو طلب کر لیا گیا۔ نوشہرہ میں پولیس نے پہنچ کر حالات کو قابو پایا جبکہ ٹانک میں فوج کے جوان پولنگ اسٹیشن پر پہنچ گئی۔ نوشہرہ میں جے یو آئی اور تحریک انصاف کے کارکن۔ صوابی میں عوامی جمہوری اتحاد اور اے این پی اور کرک کے وارڈ17 میں پی ٹی آئی اور آزاد ا±میدوار آمنے سامنے آ گئے۔